الشاعر وليد المليجى
رباعيات من وحى الآيات
----------
( وليد 1 )
ربك بياخد نفوس لما يحيـن موتها
و نفوس فى ساعة منام يقطع أنين صوتها
و يسيب نفوس للأجل مكتوب و متقدَّر
آية لعـاقل يفـكَّر فيـها ما يفوتها
----------
( سامية 2 )
ولما تيجى المصايب كون من الشاكرين
تسمـع كلام ربنـــا وتبــشر الصـــابريــن
كلمة رضا بالقدر فى الجنه تبقـى حياه
وقـــول قضـاء الله واحـــنا اليه راجعــين
----------
( وليـد 3 )
قول يا مـحمد وعِّـــى كل اللى كفر
أنا مش هأكون عابد صنم ولا منتظر
وانتـــوا مـاليكم تــعبــدوا رب الأنــام
دينــكم لــكم وانا ليا ديـــنى يابشر
----------
( سامية 4 )
لمَّا ينادى لـْ صَلَا دايماً فى يـــوم جمــعه
إذهـب لـذكر الإله إجرى أوام و اســعـى
إترك تجاره وبيـع واوعى لـَ مال يقلقــك
ربك كريم يرزقـك من رحمته الواسعــة
----------
( وليـد 5 )
أرضه جعلها فراش والسقف فـــوق القمرْ
نَزِّل مــطر ع النبات مـــنه بـيطـــلع ثـَـمرْ
ودا رزق منه لكم طب ليه يكون له شريك
وانت اللى عقلك فيك والجهل فيك اختمرْ
----------
( ساميـة 6 )
قول للعباد يا نبى مهــما عملتو ذنوب
أوتسرفو فْ ذنبكم وتزيدوا ع المكتوب
لا تيأسو عمركم لو كات حمولكو جبال
ربك ده من رحمته ... يغفرها لما نتوب
----------
( وليـد 7 )
بالغيب تخـــاف ربنا يــغفر ويــعطى الأجــر
وان يوم كتمت الكلام أو كان مصيره الجَهْرْ
ربك بــذات الصــدور عالـــم وعــنده الـخِبِرْ
هو الــلى خالق بشر يعصى عليه الأمــرْ ؟؟
----------
( سامية 8 )
ربك بيـعرض أمـانته ع السمـا والأرض
وجباله تـخشاها وبيكون الجواب الرفض
تقبلها يا إنسان يـــاظلوم ومــن جهــلك
مخايفش يوم تهلك بسؤالها يوم العرض
----------
( وليـد 9 )
إعرض عن الذكر ما تلاقى الحياة ناعمة
يوم الحساب راح تكون وسط البشر أعمى
تسأل ياربِّى أنا أعمى و كنت بصير
تنسى الآيات تتنسى ... يا جاحد النعمة
----------
( ساميـة10 )
وتعيش بتهمز وتلمز فى نهارك وطول ليلك
تاكل فى لحم أخوك وتـــمِيل على ميــلك
ده لو تــشوف النار ما كان طلعـــلك صوت
ياللى ما تخشى الموت فى الأخره ياويلك
ليست هناك تعليقات:
إرسال تعليق